Мора ли обука за Microsoft Office?

Новица Наков на неговиот блог посочува дека владата и покрај добрата намера да образува што е можно поголем дел од популацијата преку бесплатни курсеви за користење пакети за канцелариско работење, сепак прави еден сериозен превид, ставајќи го „Интернет“ како дел од пакетот „MS Office“. Секако, тука стои забелешката на Новица дека „Интернет не е дел од MS Office“, но уште поважно е да се каже следново...

Вистина е дека Microsoft Office е најпопуларен пакет од програми за канцелариско работење, и секако дека е корисно да се знае да се работи со него. Но, голем недостаток на овој пакет е што е скап, особено за таа таргет група која би требало да научи да го користи: млади, невработени луѓе кои а) немаат реална потреба да вложуваат пари во софтверски пакет затоа што неговото познавање потенцијално ќе им донесе вработување, и б) за пакетот постои сосем рамноправна алтернатива, но бесплатна - OpenOffice!

Microsoft Office во Северна Америка се продава за цени кои почнуваат од 400 долари, а познавајќи ги маржите на фирмите кои во Македонија ги препродаваат производите на Microsoft, кај нас цените ќе почнуваат од најмалку 500 американски долари. Имајќи предвид дека токму ЦЕНАТА е еден од одлучувачките фактори при купувањето компјутер за прв пат, логично е дека треба да се цели кон што пониски цени. Еве како без мозгање да се заштедат стотици долари (колку што е вредноста на целиот компјутер, ако не и повеќе), со само три одлуки:

• Владата веќе најави можност за купување компјутери по многу повластени цени („набавни цени“), затоа што за нив не ќе се плаќаат даноци и царини, а и ќе се набават во големи количини (и со тоа по уште пониски набавни цени). Тоа е одлична замисла!
• Наместо оперативен систем со почетна цена од 200 долари во САД (а кај нас најверојатно поскапо), компјутерите да се прединсталирани со Ubuntu Linux оперативен систем. Уверен сум дека кривата на учење Windows и Ubuntu Linux е слична и во секој случај ја оправдува заштедата.
• Наместо купување канцелариски пакет од 400 долари и нагоре, компјутерите да имаат прединсталиран OpenOffice.

Сега да повлечеме црта и да пресметаме што сме заштедиле: на хардверот ќе се заштеди барем 100 долари по компјутер, на оперативниот систем барем 200 долари, а на канцеларискиот пакет барем 400 долари. Сумарната заштеда ќе биде најмалку 700 долари од секој компјутер!

Па така, сопствениците на нови компјутери ќе треба да платат само некоја цена меѓу 250 и 500 долари, која по моја проценка е реалната цена на чинење во дадените услови. Знам дека тоа за повеќето се многу пари, дури и недостижна сума, но бенефитите од имањето компјутер дома се толку големи што цел блог Panta Rei не ми е доволен да ги опишам. А сè што е исплатливо, не е скапо.

И сега, да се вратиме на почетната тема и кратко да заклучиме: Владата треба да воведе бесплатна обука за OpenOffice, а не за Microsoft Office.

Tags: open, source, software, OpenOffice, open, office, MS, Microsoft, Vista, Windows, price, expensive, Linux, Мајкрософт, Офис, Линукс, слободен, софтвер, Macedonia, Македонија, Panta Rei, GoodBytes.